GALANTIN, NEGOZZI DE CORNIS
Di vòlt l'incontri, in gir per il rion,
dolza e composta come 'na Madònna,
la va per commission...
anca se del negozzi l'è la padròna.
Negozzi? Sì, negozzi de cornis,
via Pezzotti, in front al Campanin.
Férmes on momentin,
férmes e guarda denter: sora i mur
ricamm, fotografii, stamp e pittur
fan bella móstra, spetten la cornis...
Lee, la Rachele, cont el coo piegaa
sora el bancon, la truscia*, la pessega*,
arent arent on omm
on fior de stazza* e on para de barbis
che indeperlor guarnissen* la bottega!
Ona bottega, vegnì e vedarii
'n doe se sgobba de mattina a sera,
'n doe el client el resta ben servii,
chi ven 'na volta, torna volentera,
per l'onestà, l'impegn, la precision,
tutt robb che al dì d'incoeu
finissen maneman in del ballon*.
E mì, se fussi bòna,
je mettaria lor duu in d'ona cornis,
la Rachele in poltròna,
e lù vesin vesin,
de fagh fina i galitt cont i barbis!